O AECT Rio Minho e o Comité da conca do río Uruguai intercambian experiencias

O día 28 de novembro realizouse un seminario de cooperación transfronteiriza en Valença, na sede do Agrupamento Europeo de Cooperación Territorial (AECT) do Río Miño. A este evento asistiron un conxunto de autoridades institucionais de Arxentina, Brasil e Uruguai, participantes no Comité para el Desenvolvemento da Conca do Río Uruguai (CDCRU), organismo que xestiona a cooperación na tripla fronteira entre estes países, que comparten a conca do río Uruguai.

A xornada de traballo organizouse en catro bloques temáticos, con presentación da realidade de cada situación e debate posterior.

O primeiro tema tratado foi a experiencia de cooperación. Uxío Benítez, director do AECT Rio Minho, falou sobre a experiencia no río Miño transfronteirizo, e Martín Oliva, intendente de Concepción do Uruguai e Vicepresidente do CDCRU, sobre a experiencia na conca do río Uruguai.

No segundo debate tratouse sobre estratexia. Valerià Paül, coordinador do equipo redactor da ‘Estratexia do Río Miño transfronteirizo 2030’, disertou sobre este informe, e Daniel Bentancur, coordinador da Secretaría Técnica do CDCRU, sobre a folla de ruta para a conca do río Uruguai.

No terceiro, tratáronse o investimento e as infraestruturas. Nuno Almeida, director do AECT Galicia-Norte de Portugal, expuxo o Plan de investimentos conxuntos Galicia-Norte de Portugal para o período 2021-2027, e Maher Jaber, Juan Carlos Álvarez e William Nestro Cresseri, presentaron o Comité da subconca trinacional e a realidade da tripla fronteira.

No cuarto e último, o debate centrouse no papel dos observatorios transfronteirizos. Xavier Martínez Cobas, coordinador científico do ODT presentou o Observatorio das Dinámicas Transfronteirizas do río Miño, e Marcos Pedro Follonier, responsable do Observatorio do CDCRU, presentou o Observatorio Socio Económico do CDCRU.